CONTOH BERITA BERBAHASA BALI

Hai haii haii,,, ketemu lgi bersama saya di blog kesayangan kita bayuajuzt.blogspot.com. Pada malam ini saya akan coba share berita yang berbahasa bali atau disebut ORTI BALI. Sya sendiri sebagai masyarakat bali mencoba membantu para semeton semua  agar bisa mahir bahasa bali atau mungkin juga sebagai bahan ajar dalam mengikuti kegiatan disekolanya. 
Tanpa panjang lebar lagi langsung dipilih deh beritanya,, karena ada banyak yaww:
Ingin tau atau lebih kenal dengan saya? Klik Profil ini

Berita 1(orti 1) :
Judul : Katawahan Wentuk Tapel Bali Manut Fungsi

TAPEL kasub pinaka sinalih tunggil asil seni tradisional Bali sané kekaryanin antuk taru, kertas, kain, miwah bahan lianan tur antuk wentuk sané malian-lianan. Wénten sané marupa déwa déwi, manusa, buron, raksasa, miwah sané lianan. Patut kategasang malih sesolahan sané nganggé tapel kawastanin topéng. Ring sajeroning aktivitas kesenian Bali, tapel lumrah kaanggé sajeroning péntas sesolahan miwah drama tari. Sinalih tunggil kawigunan tapel inggih punika nyihnayang pamiteges watak utawi karakter saking soang-soang tokoh.

Kawéntenan sesolahan topéng katarka sampun wénten duk masa pemerintahan Raja Jayapangus abad X. Indiké punika kacihnain antuk kawéntenan makudang-kudang istilah minakadi atapukan (istilah sané kaanggén ngawastanin penekep tapel) sané munggah ring prasasti Jaya Pangus. Lianan ring punika, wénten taler munggah ring prasasti Ularan Playasara, Prasasti Bebetin (tahun 896 Masehi), miwah Prasasti Blantih sawatara 1059 Masehi.

Kawéntenan topéng ring tengahing kauripan krama Bali, gumanti taler dahat mapaiketan ring sakatah pamargin upacara keagamaan Hindu, santukan kasujatianné kesenian janten luluh ring kawéntenan agama miwah krama. Topéng sané kaanggén pinaka panyangkep saluiring pamargin upacara agama katah kawastanin topéng wali. Pregina sané nyolahang topéng wali lumrahnyané ngambil daging carita saking babad pinaka sumber sejarah.

Yéning selehin ring wentuknyané, manut I Madé Sama, sané wantah perajin tapel mimitan Banjar Penida, Désa Negara, Sukawati, Gianyar, ri kala kacunduk daweg Buda 3/10 lintang nlatarang, tapel kaepah dados kalih ciri inggih punika, tapel sané marupa penuh (nutupin sikian prerai), miwah sané marupa asibak (wantah nutupin prerai saking gidat kantos pipi).

“Pregina sané nganggé tapel penuh, ri kala masolah lumrahnyané nénten malih kasarengin antuk suara utawi bebaosan. Indiké punika janten malianan ring kawéntenan pregina sané nganggé tapel marupa asibak, sané lumrahnyané kasarengin bebaosan antuk basa Kawi miwah basa Bali,” baosnyané.

Tokoh-tokoh sané katah kasolahang nginutin ciri soang-soang tapel minakadi Panglembar (topéng keras, utawi topéng tua), Panasar (kelihan, sané tuwan, sané alitan antuk topéng sané alitan), Ratu (Dalem miwah Patih), miwah Bebondrésan (panjak utawi rakyat).

Manut wilangan pregina sané nyolahang, sesolahan topéng kaepah dados makudang-kudang sesolahan inggih punika Topéng Pajegan, Topéng Panca, miwah Topéng Prémbon. Topéng Pajegan kasolahang olih sinunggil pregina tur nyolahang makudang-kudang tokoh ring sajeroning carita. Topéng Pajegan pinaka pangiring ring sajeroning pamargin yadnya, tur ring pungkurin carita raris kapuputang antuk topéng Sidhakarya pinaka puncak pamuput pamargin yadnya punika. Pregina sané nyolahang topéng Pajegan patut wikan ring widang spiritual. Punika awinan topéng pajegan mesti prasida ngicén dharma wacana majeng i krama indik unteng pamargin yadnya, tetujon mayadnya, miwah pikobet sané pacang metu yening yadnya nénten kamargiang.

Lianan ring punika, wénten taler sané kawastanin Topéng Panca. Topéng Panca kasolahang olih limang diri pregina. Topéng puniki wantah pinaka panglimbak topéng Pajegan.

Topéng Prémbon pinaka sesolahan sané mawit saking penggabungan seni topéng miwah arja. Nanging, ring sasolahan topéng prémbon, struktur topéngnyané kantun dominan, tur lakon sané kamedalang lumrahnyané kaambil saking carita Babad miwah sejarah.

Maosang indik tata cara makarya tapel, Madé Sama sané sarahina mageginan pinaka perajin tapel maosang, asiki tapel wantah prasida kekaryanin kirang langkung salami pitung rahina.

Katakenin indik syarat sané mesti kaduénang sadurung makarya tapel, Dané maosang nénten muatang syarat. “Makarya tapel, sira manten dados. Yén rereh becikné, makarya tapel napi malih nyolahang topéng, mesti kariinin mawinten, mangda napi sané kakaryanin prasida mataksu.” baosnyané.

Sadurung makarya tapel pastika kariinin antuk ngrereh taru sané gumanti becik kaanggén bahan tapel. Taru sané kabaos becik inggih punika taru sané sampun wayah.

“Taru sané becik kanggén tapel khususnyané topéng wali, minakadi taru pulé, bentaro, dapdap wong, miwah taru jepun sané sampun wayah,” baosnyané.

Ngrereh taru sané kaanggén pinaka bahan tapel taler nénten dados ngawag, tur mesti nginutin déwasa sané becik. “Titiang nginutin déwasa, napi malih jagi anggén topéng wali. Sekadi rahina purnama miwah rahina lianan. Titiang taler nginutin déwasa sané wénten ring kalénder,” dané nyelehin.

Taru sané sampun kapolihang raris kalanturang ring makudang-kudang tahap, sekadi kariinin antuk tahap makal. Makal inggih punika tahap dasar ngwentuk tapel. Ring tahap puniki, taru sané pacang kaanggén tapel kapotong antuk makudang ukuran. Wusan punika raris kalanturang antuk tahap sané kawastanin nyalonang. Ring tahap puniki, taru sané sampun kapotong raris kawentuk antuk makudang-kudang piranti minakadi pahat, pangot cenik, miwah pangot ageng, kantos taruné punika marupa tapel setengah jadi. Ring tahap puniki, taru kawentuk manut modél tapel sané pacang kekaryanin. Sekadi makarya tapel Bebondresan sané madue rupa tawah, minakadi giginyané sané tonggos, cungguhnyané sané lantang, miwah matanyané sané kupit.

Wusan tahap punika raris kalanturang malih antuk tahap ngalusin, mapiranti pangerot, pangutik miwah amplas. Sasampuné punika, pinaka tahap pinih ungkur, tapel punika raris kadagingin warna antuk cat arclirik miwah prada, tur wénten taler kadagingin alis miwah kumis. Cat sané kapulas janten nganutin soang-soang karakter minakadi Dalem (mawarni putih), Patih (mawarni barak nasak manggis), Topéng tua (mawarni Krém), Pedanda (mawarni nasak gedang utawi nasak mangis), Sidhakarya (mawarni putih), tur bebondresan (mawarni selem, coklat, utawi krém).

Manut anak lanang sané sampun mayusa 57 tiban punika maosang, tapel sané kekaryanin olih soang-soang perajin pastika madué “tebek” sané malianan, yadiastun makarya topéng sané pateh. “Tebek” kaanggén maosang istilah guétan ring tapel sané prasida ngamedalang karakter topéng.

Yéning maosang indik pangarga, I Made Sama sané taler nerima pasuh “ngwah” tapel maosang, pangarga tapel janten malianan manut kasukilan rupan wentuk tapel punika. Sekadi makarya tapel Dalem sané kabaos pinih sukil katimbang antuk makarya rupa topéng lianan. Dané taler maosang, kasujatiané asil pakaryan sané marupa karya seni gumanti nénten prasida kaajiang antuk jinah, nanging sané pinih utama wantah kepuasan rasa.

Kawéntenan tapel pinaka sinalih tunggil warisan budaya krama Hinduné ring Bali, sané mangkin prasida kaucap kantun lestari. Indiké punika kacihnain antuk sesolahan topéng sané kantun kamargiang. Kawéntenané punika nénten lépas saking sinalih tunggil fungsi topéng pinaka penyangkep pamargin upacara yadnya krama Hinduné ring Bali.


Berita 2 (Orti2 ) :
Judul  :  TUNTUNAN KARAKTER WANGSA

SAJERONING ngulatiang saha ngamolihang pikarsa (cita-cita) pawangunan wangsa, séktor pendidikan banget pisan patut kauratiang. Wantah malarapan mutu pendidikan sané becik pacang prasida ngwetuang sumber daya manusia sané umandel. Pendidikan sané becik sajeroning pawangunan wangsa sané kabaos aor tan pawates puniki wantah pendidikan sané prasida ngwetuang SDM sané madué kawikanan utawi (intelektualitas) imbang ring moralitasnyané. Duaning asapunika pawangunan séktor pendidikan patut kadasarin antuk nilai-nilai adiluhung karakter wangsa.

Malarapan punika, pas pisan pikarsa sané kamanggala antuk Kementerian Pendidikan Nasional RI, ngangkat téma perayaan Hari Pendidikan Nasional warsa 2011, inggih punika “Pendidikan Karakter Sebagai Pilar Kebangkitan Bangsa” antuk subtema “Raih Prestasi Junjung Tinggi Budi Pekerti”.

Matepetan ring punika, Presidén Soesilo Bambang Yudhoyono taler ngaptiang rakyat Indonesiané mangda sida midabdabin téma inucap antuk ucapan “Kita ingin bangsa Indonesia memiliki generasi unggul pada peringatan satu abad proklamasi kemerdekaan Indonesia. Generasi unggul adalah generasi yang memiliki karakter yang memenuhi kualifikasi unggul” (2011:6).

Manawi iraga sami, cumpu mungguing kaonnyané martabat wangsa druéné kadi mangkin wantah mawiwit saking rerednyané karakter wangsa parajana druené. Yéning para élit politiké miwah sang maraga ngawerat katiben krisis kepercayaan, prasida kapastikayang wantah puaran pakisidan (pergeseran) nilai-nilai adiluhung sané patut kautamayang. Sajeroning ngamecikin panegara druéné saking ancaman kekaonan (keterpurukan) pinaka puaran para pemimpiné sané nénten wicaksana (jujur), akéh sané korupsi miwah keni kasus suap, sané janten akéh ngerugiang panegara, nénten wénten pamargi tios, sajaba i raga patut mawali ka jati angga druéné, nginggilang nilai-nilai luhur Pancasila, sané sampun saking dumun mabukti sida mikukuhin panunggilan wangsa.

Maiketan ring indiké punika, Présiden Soesilo Bambang Yudhoyono maosang limang konsep tuntunan karakter wangsa kadi puniki.

(1) Rakyat Indonesiané patut yukti-yukti maderbé moral, akhlak, lan parilaksana sané becik. Duaning asapunika, para janané mangda mawatak religius, beradab, saha anti ring kekerasan;

(2) Wangsa Indonesiané patut manados wangsa sané wikan (cerdas lan rasional), madué daya nalar becik, madué visi lan misi, madué pikarsa ngwangun masa depan sané becik;

(3) Wangsa Indonesiané pungkuran, patut sayan kréatif lan inovatif. Jemet (kerja keras) ngruruh kemajuan kanggén nguwah kawéntenan sané sayan becik.

(4) Wangsa Indonesiané patut molihang semangat “Pasti Prasida, Harus Bisa” (can do spirit), sané mateges, nénten makirig atapak (pantang menyerah), setata mautsaha ngrincikang pidabdab (solusi), saha pamuputnyané prasida nglaksanayang solusi punika.

(5) Makasami yowana Indonesiané, patut manados patriot sejati sané nresnain wangsannyané miwah panegarannyané. Sané mangkin, iraga nénten dados nganutin nasionalismé cupit (narrow nationalism), nanging nasionalismé sané wikan (cerdas) lan patriot sejati.

Mantuk ring para guruné makasami, presidén ngaptiang mangda setata prasida nyusupang nilai-nilai pendidikan karakter ring saluir paplajahan sané kaemban lan kaajahin.


Berita 3 ( Orti 3) :
Judul : Kemiskinan ring Tengah Derasnyané Gemerincing Dolar

INDUSTRI pariwisata ring Bali ngranjing ring jajaran top dunia. Napi mawinan asapunika, riantukan wénten makudang kamar hotél lan vila sané sampun matarif satusan yuta rupiah awengi kémanten. Genah hiburan malam antuk tarifnyané mael taler kalintang élah kapanggihin ring Bali. Kémahon ring walik punika, panyiuan krama kantun idupnyané tuara utawi miskin. Kadirasa wantah ngajeng kémanten ipun tan prasida. Derasnyané gemerincing dolar saking séktor pariwisata durung prasida kadadosang ukuran ring kramanyané kasengguh idup sejahtera. Paindikan punika kabligbagang ring sajeroning acara Isin Gumi Radio Singaraja FM 92,0 Mhz rahina Buda, 19 Septémber 2012 lintang.



Ketut Milo, Lovina

Lumrahné, jagat Bali wantah kasumbung pinaka wewidangan utawi daérah tujuan pariwisata kémanten. Kémahon durung kantos ka pelosok-pelosok désa pariwisata punika prasida nglimbak. Tunas tiang ring pihak sané wenang utawi sané nanganin pariwisata tedun ngicénin penyuluhan-penyuluhan ring krama. Napi sané patut kalaksanayang olih krama mangda sida ngamolihang imbas saking pariwisata punika lan sida nincapang kasukertan kauripannyané.



Bu Novi, Tunjung

Kantun akéh krama Bali idup tiwas ring tengahing gemerlapnyané pariwisata lan gemerincing dolar, puniki cihna kemajuan pariwisata ring Bali nenten ja pacang ngawé masyarakatnyané prasida idup sejahtera. Minabang wantah akidik sané sida ngecapin kawéntenan punika. Mawinan sampun sapatutné pamerintah Bali lan sané nanganin kepariwisataan mikayunin indik lan kawéntenan puniki. Sapunapi antuk mangda gemerlapnyané pariwisata punika prasida kerasaang olih krama Bali asli.



Aji Bima, Banjar

Kantun akéh pakaryan sané patut kaambil anggén nincapang kasukertané. Puniki kabuktiang olih krama tamiu saking dura Bali makarya iriki sida idupnyané sugihan yening saihang ring krama Baliné. Nah samian puniki kaawinang ipun ulet tekun lan tan géngsi. Diastun ja i raga idup ring jagat sané kasub kantos ka dura negara pariwisatané nanging manut tiang sampunang tergantung sareng nika.



Agung, Jl.G.Rinjani Singaraja

Krama miskin utawi tiwas ring Bali sayan maweweh. Ring sisi lianan para toris saking manca negara rauh meliah, kahanan puniki janten sampun gemerincing dolar taler membah bales pisan. Nanging kasujatiannyané wantah para invéstor sané ngamolihang dolar punika lan krama Bali watah dados penonton kémanten. Puniki kaawinang kirangnyané SDM i raga ring makudang widang, mawinan para invéstor tan nganggéang. Mangkin sapunapi antuk krama Bali mapidabdab mangda tan terus dados penonton kémanten.

Dika, Déncarik

Pemerintah madué tanggung jawab antuk kawéntenan inucap, sakadi sané kasurat ring Undang-Undang Dasar, inggih punika anak tuara lan telantar kapiara lan kapayungin olih negara. Kadi mangkin kantun kirang pisan uratian pamerintah majeng masyarakat tuara, patut karerehang pamargi mangda masyarakat prasida nincap kasukertannyané



Ayu Gék, Diringdikit

Bali pinaka pasar sané ngawinang akéh krama tamiu saking dura daérah ngarereh kauntungan ring séktor pariwisata lan pedagang. Riantukan ipun ulet, jemet lan tan géngsi ngawinang ipun prasida suksés. Nah yéning krama Bali tan sida nuutin sakadi punika, i raga pacang kalah saing. Taler kaawinang krama Bali kirang kemampuannyané ngardinin pakaryan lan pemasaran barang kerajinan sané kekaryanin. Ngawit mangkin ngiring samian krama Bali jengah nincapang kasejahteraanyané.



Mang Eby, Lovina

Samian punika mawali ring i raga soang-soang, ring kahanan sakadi mangkin sapunapi carané nincapang kawagedan. Minakadi nyarengain khursus utawi pelatihan-pelatihan kepariwisataan. Yén punika sampun kamarginin sinah élah pacang katerima makarya ring genah-genah sané mapaiketan sareng pariwisata. Pungkuran pacang sida ngirangin krama tuara ring Bali. Lianan punika Pemerintah Daérah taler mangda ngawéntenang prakanti sareng invéstor, krama lokal mangda kautamaang pinaka tenaga kerja.



Gede Balbo, Jl.Segara Penimbangan Singaraja

Rumah tangga miskin ring Bali kantos siuan tali ring tengahing gemerlap pariwisatané, punika nénten tios riantukan kauripan kramané mangkin sané miskin pangeweruh utawi ilmu, during prasida nincapang pangeweruhnyané mawinan tingkat ékonomi sané sayan nedunang. Pinunas titiang ring pamucuk jagat Bali mangda ngamungkah lapangan kerja, ngicénin pelatihan-pelatihan, usan punika wau genah makarya.


Berita 4 ( Orti 4 ) :
Judul : Pujawali Ngusaba Purnamaning Sasih Kapat ring Pura Tuluk Biyu Batur

PURA Tuluk Biyu Batur Parahyangan Agung Pucak Gunung Abang sané magenah ring Désa Batur, Kecamatan Kintamani, Kabupatén Bangli. Pacang ngamargiang Karya Pujawali Ngusaba Purnamaning Sasih Kapat Warsa 2012. Dudonan karya ring Pura Tuluk Biyu Batur kamargiang ngawit tanggal 16 Septémber 2012 nepet rahina Redité Pon Medangsia kantos tanggal 8 Oktober 2012 rahina Soma Kliwon Klurut.

Mapaiketan sareng dudonan karya punika pengemong miwah prawartaka karya matur piuning majeng Ida Dané Umat Hindu Se-Dharma sareng sami turmaning ngaptiang mangda prasida pedek tangkil sajeroning upacara punika. Ngeninin indik éédan karya sané pacang kamargiang makadi ring sor puniki.

Ring rahina Anggara Paing Pujut tanggal 25 Septémber 2012, Pacang kamargiang pula-pali Rsi Gana Mapiuning Karya, Nuhur Tirta ring Pucak Gunung Abang, Tirta Sapuh Jagat, Tirta Segara Danu, Ngunggahang Sanghyang Raré Anggon, Nanceb Sunari, Sanggar Tawang.

Raris rahina Sukra Kliwon Pujut tanggal 28 Septémber 2012, éédan sané kamargiang inggih punika Ngadegang Bagia Pula Kerti. Bénjangné ring rahina Saniscara Umanis Pujut tanggal 29 Septémber 2012, kamargiang Mapepada Wewalungan, Ida Bhatara-Bhatari Katuran Bhakti Pengodal lan Pesucian.

Salanturnyané tanggal 30 Septémber 2012 nepet rahina Redité Paing Pahang, kamargiang Puncak Karya Mapepada Agung, Pujawali Ngusaba Sasih Kapat. Bénjangné rahina Soma Pon Pahang tanggal 1 Oktober 2012 kamargiang pula-pali Wayon Ageng Walikota Dénpasar miwah Pémkab Karangasem.

Tanggal 2 Oktober 2012 rahina Anggara Wagé Pahang kamargiang Wayon Alit, Bhakti Penganyar Kabupatén Gianyar, miwah Tabanan. Raris rahina Buda Kliwon Pahang tanggal 3 Oktober 2012, kamargiang Bhakti Penganyar Pemkab Bangli.

Salanturnyané rahina Wraspati Umanis Pahang tanggal 4 Oktober 2012 kalaksanayang Bhakti Penganyar Pemkab Klungkung. Bénjangné tanggal 5 Oktober 2012 nepet rahina Sukra Paing Pahang kamargiang Bhakti Penganyar Pemkab Buléléng.

Yéning Bhakti Penganyar Pemkab Jembrana kamargiang ring tanggal 6 Oktober 2012 nepet rahina Saniscara Pon Pahang. Salanturnyané tanggal 7 Oktober 2012 rahina Redité Wagé Klurut kamargiang Bhakti Penganyar Pemkab Badung. Rahina Soma Kliwon Klurut tanggal 8 Oktober 2012, kamargiang Bhakti Pepranian, Ngelantur Ida Bhatara Katuran Bhakti Pengeluhur.

Punika indik dudonan karya sané pacang kamargiang ring Pura Tuluk Biyu Batur, gumanti prasida kapiarsayang sareng sami olih Umat Hindu/Umat Se-Dharma. Dumogi Pujawali sané pacang kamargiang nemoning labda karya, tur paripurna sida sidaning don.


Berita 5 ( Orti 5 ) :
Judul :  Makudang-Kudang Tradisi ring Bali

Bali pinaka sinalih tunggil pulo ring wewidangan Negara Kepulauan Républik Indonésia sampun kaloktah ring sajebag dura negara antuk kaasrian alam, budaya miwah tradisi. Mayuta-yuta turis lokal miwah dura negara rauh ka Bali nyabran warsa. Daya tarik pesona genah-genah wisatané ring Bali pinaka objék wisata sané nénten wénten telasnyané karauhin, sakadi objék wisata Pantai Kuta, Sanur, Tanah Lot, Bedugul, Kintamani, miwah makudang-kudang lelampahan seni ring Bali. Lianan ring kaasrian alam sané dahat becik, pulau puniki taler katah madué budaya miwah seni tradisi sané tawah. Yéning selehin ring teges krunané, tradisi utawi dresta madué teges pinaka adat sané kamargiang tumurun saking leluhur tur kantun kamargiang olih kramané kantos mangkin.

Wewidangan ring Bali sané kaepah dados makudang-kudang kabupatén gumanti madué seni, tradisi utawi dresta sané dahat mabinayan ring soang-soang kabupatén. Kawéntenan seni tradisi punika pinaka tetamian leluhur sané kantun kalaksanayang olih kramané ring Bali kantos mangkin. Makudang-kudang seni tradisi ring Bali lumrahnyané kalaksanayang ri kala nyanggra utawi nepetin ring pamargi rahinan jagat hindu minakadi, rahina Galungan, Kuningan, Nyepi miwah rahina-rahina lianan.

Wénten makudang-kudang seni budaya miwah tradisi sané tawah, sakadi sané wénten ring Kabupatén Karangasem. Sinalih tunggil seni tradisi sané sampun sering kamargiang ring Bali minakadi tradisi Mekare-kare utawi katah kasambat tradisi Perang Pandan sané kalaksanayang nyabran sasih kalima ring Désa Tenganan, Karangasem. Tradisi Mekare-kare kamargiang pinaka upacara persembahan majeng para leluhur miwah Déwa Indra sané kapercaya pinaka Déwa Perang. Manut nilai historisnyané, kacritayang Déwa Indra mayuda ngalawan Maya Denawa, Raja Bali trah raksasa sakti sané madué bikas kaon sawenang-wenang nambakin krama hinduné ring Bali ngaturang sembah majeng ring Ida Sang Hyang Widi Wasa. Tradisi Mekare-kare kalaksanayang nganggén sanjata sané kekaryanin antuk pandan madui pinaka lambang gada sané kaanggén mayuda. Tradisi punika kalaksanayang olih sakatah krama lanang Désa Tenganan, saking krama sané kantun alit-alit, kantos sané sampun lingsir. Yadiastun para kramané ring sajeroning ngamargiang Mekare-kare punika kantos ngamedalang rah ring anggannyané, nanging kawéntenané punika nénten kantos ngamedalang biyuta ring soang-soang krama. Sesampuné wus maperang, soang-soang krama punika raris saling tulungin nyabutin duin pandan tur nagingin tamba sané kekaryanin antuk kunyit tur daun basé. Lianan ring tradisi Mekare-kare, wénten taler tradisi sané nyihnayang paperangan sané kawastanin Gebug Seraya utawi Gebug Éndé. Sakadi wastannyané, Gebug Éndé kalaksanayang olih sakatah krama ring Désa Seraya Karangasem. Gebug Éndé masrana antuk penyalin salantang 1-2 meter, tur Éndé sané madué teges taméng sané kaanggén pinaka panangkis. Gebug Éndé sané kairingin antuk gamelan puniki kasujatiané nénten wantah pinaka lelampahan kémanten, nanging madué tetujon sané dahat katengetang. Tradisi Gebug Éndé kapercaya olih krama pinaka jalaran anggén nedunang sabeh ri kala lahru. Pateh sakadi tradisi Perang Pandan, krama sané ngamargiang Gebug Éndé taler nénten kantos ngawetuang biyuta sawusan ngamargiang tradisi punika.

Ring wewidangan Dénpasar, wénten tradisi sané kawastanin Oméd-médan. Tradisi Oméd-omédan kalaksanayang olih sakatah yowana ring Banjar Kaja, Sésétan. Yéning selehin ring krunané, oméd-omédan madué teges saling kedeng. Prosési puniki kariin antuk ngamargiang pamuspan sané matetujon nunas karahayuan. Wus punika para yowanané raris kaepah dados kalih, sawetara 50 diri yowana lanang, tur yowana istri. Sesampuné polih arahan, raris kaadu. Barisan sané pinih ajeng saling diman tur katonton sakatah krama. Tradisiné punika kapercaya madué tatujon pinaka panulak baya.

Tradisi sané taler dahat ngulangunin inggih punika tradisi Makotékan sané sampun kamargiang duk masa kerajaan Mengwi. Tradisi puniki kalaksanayang pinaka makélingin kemenangan kerajaan Mengwi daweg mayuda ngalawan Kerajaan Blambangan. Kawastanin tradisi Makotékan santukan kawéntenan suaran kayu sané saling matabrakan ri kala kayu-kayuné punika kasikiang ngawentuk gunung. Kayu sané kagabung punika raris ngawetuang suara ték ték tur raris tradisiné punika kawastanin Makotékan. Makotékan kamargiang olih satusan krama lanang ring Désa Munggu ri kala nepetin rahina Kuningan.

Lianan punika, kantun ring wewidangan Badung, taler wénten tradisi sané kawastanin tradisi Siat Tipat. Siat Tipat pinaka tradisi sané kamargiang olih krama Désa Kapal ri kala sasih kapat. Suksmaning pamargi tradisi puniki, pinaka simbol asal muasal kauripan manusané ring marcepada. Tipat kapercaya pinaka lambang purusa, tur bantal pinaka lambang pradana. Siat Tipat taler matetujon pinaka jalaran ngaturang suksmaning manah olih krama majeng ring Ida Sang Hyang Widhi Wasa antuk waranugraha sané kapaica marupa panén sané melimpah. Prosési puniki kariinin antuk pamuspan sané kamargiang olih para krama ring Désa Kapal tur nganggé sesaji sané katurang marupa tipat tur bantal. Wus punika, sesampuné kaicén arahan olih Ida Jero Mangku raris krama sané sampun kaepah dados kalih kelompok raris saling entungin tipat lan bantal.

Wénten taler tradisi ngentungang jinah sané kawastanin tradisi Masuryak. Tradisi sané kamargiang olih krama ring Désa Bongan, Kabupatén Tabanan punika kalaksanayang nyabran rahina Kuningan. Tetujon pamargin tradisi Masuryak inggih punika pinaka jalaran rasa angayu bagia krama majeng ring Ida Sang Hyang Widhi Wasa antuk paica sané kapolihang olih kramané sami.

Lianan punika, kasujatiané kantun makéh malih tradisi-tradisi sané wénten tun kantun kamargiang olih kramané ring Bali. Yéning selehin malih, sakatah tradisiné punika sujatiné ngamuatang nilai tur tetujon sané dahat mautama ring sajeroning pamarginé. Mawit saking sarana kantos pamarginé madué smerti sané dahat mautama ngastiti ring kasukerthan jagat. Kawéntenane pamargin tradisiné punika taler pinaka cihna krama Baliné sané kantun pageh ngamargiang tradisi tetamian leluhur kantos mangkin. Kawéntenané punika gumanti taler ngawetuang dampak positif majeng i krama indik pelestarian budaya miwah daya tarik pariwisata. Makudang-kudang tradisi punika sapatutnyané mangda tetep kalaksanayang tur kadasarin antuk nilai-nilai sané dahat mautama sumangdané pamargin sakatah tradisi ring Bali prasida ngawinang krama Baliné satata rahayu tur ajeg. 


Berita 6 ( Orti 6 ) :
Judul :   Kuningan, Ka – Uningan Molihang Kaweruhan

 WAU pisan i raga sampun nglaksanayang tur ngamargiang rahina sané kawastanin rahinan jagat Galunan miwah reruntutannyané. Sané mangkin i raga dados krama Bali taler pacang nglaksanayang tur ngamargiang reruntutan rahinan jagat Galungan sané kawastanin rahinan Kuningan sané jatuh ring rahina Saniscara Kliwon wuku Kuningan. Lianan kawastanin rahinan jagat Kuningan, rahina puniki taler kawastanin Tumpek Kuningan santukan Saptawara Sukra matemu sareng Pancawara Kliwon.

Rahinan Kuningan puniki pinaka reruntutan rahinan Galungan sané jatuh dasa rahina sesampun rahina Galungan. Rahinan Kuningan kangken pinaka rahina sané khusus, santukan sarana upakara miwah bebantenan sané kaunggahang tur kaaturang mabinayan sareng bebanten sané kaaturang ri kala rahinan Galungan miwah galah ngalaksanayang pamuspan taler mabinayan pisan. Ring rahinan Kuningan kabuatang saranana upakara marupa sodan nasi kuning sané kagenahang ring wadah sané kawastanin tebog lan sulanggi pinaka niasa kemakmuran miwah kaunggahang bebanten sané sampun kasayagaang pinaka rasa suksmaning manah lan suksmaning idep i raga pinaka manusa sané sampun nglungsur wara nugraha ring Ida Sang Hyang Widhi Wasa marupa ajeng-ajengan ngawit saking sandang ngantos pangan.

Lianan nasi kuning, ri kala Kuningan taler kabuatang sarana upakara marupa Endongan, Tamiang, miwah Kolem. Endongan pinaka niasa persembahan majeng Ida Sang Hyang Widhi Wasa, pinaka bekel mawali ka suargaloka. Bekel sané mautama inggih punika ilmu pengetahuan (kawikanan) lan bhakti (jnana). Yéning senjata sané mautama inggih punika kaheningan pikayunan. Mawit saking rahina puniki, para krama kaptiang satata éling majeng Ida Sang Hyang Widhi, prasida becik manyamabraya, nincapang rasa saling asah asih asuh majeng sesama manusa miwah urati ring palemahan. Santukan éndongan pinaka bekel, éndongan madaging woh-wohan, tebu, tumpeng, miwah rerasménan. Tamiang pinaka niasa panulak bala lan pinaka niasa perputaran roda alam sané ngélingang manusa ring kawéntenan hukum alam. Yéning Kolem pinaka niasa genah mararian Ida Sang Hyang Widhi, para déwa miwah para leluhur i raga.

Ring rahina suci puniki kaceritayang Ida Sang Hyang widhi tedun ka marcapada kasarengin olih para déwa miwah para pitara-pitari pacang ngicénin waranugraha ring makasami umat. Ring rahina Kuningan kaaptiang majeng para krama ngaturang bakti tur nunas karahayuan miwah tuntunan majeng Ida mangda i raga satata maparilaksana becik.

Akéh sané maosang yéning ri kala rahinan Kuningan para krama mangda ngaturang bakti sadurung jam roras utawi sadurung tajeg surya. Punapi awinan sakadi punika?

Manut sinalih tunggil Dosén UNHI sané mawasta I Gedé Sedana Suci, galah sadurung tajeg surya punika pinaka galah sané pinih becik i raga ngaturang bhakti. “Ring rahina Kuningan, i raga patut ngaturang bhakti sadurung jam roras utawi sadurung tajeg suryane. Semengné, i raga nyayagayang sakancan sarana upacaka sané pacang katurang, Salanturnyané i raga ngaturang bhakti tur nglaksanayang pamuspan. Ring sajeroning Lontar Sundarigama kaunggahang, “Déwa Mur Mwah Maring Surga” artosnyané sadurung para déwa mawali ka suarga. Becikné i raga nganturang bakti sadurung tajeg surya, sadurung Ida Hyang Widhi miwah para déwa mawali ka suargaloka. yéning sampun liwat tajeg surya sira pacang kaaturin sesajén utawi bebanten?” baosnyané.



Suasana hening ngasilang Ka-Uningan, sané nuntun i raga molihang jnana sané becik pinaka ilmu pengetahun spiritual suci. Ilmu pengetahun sané kaduénang prasida kapolihang saking tetiga cara sané kawastanin Tri Pramana inggih punika Agama Pramana, Anumana Pramana, miwah Pratyaksa Pramana. Agama Pramana inggih punika mirengang paplajahan sané kaicen olih guru. Anumana Pramana inggih punika pengetahuan sané kapolihang nganggén akal, pikayunan miwah logika. Yéning Pratyaksa Pramana inggih punika pengetahuan sané kapolihang mawit saking i raga manggihin hal-hal sané madué paiketan rohani.

Rahinan Kuningan mateges mangda i raga Ka-Uningan molihang pengetahuan dharma (samya jnana). Makasami punika prasida kapolihang majalaran Dasendriya inggih punika Panca Budhindriya lan Panca Krmendriya sané kaniasayang antuk wéntennyané selang dasa rahina ring rahinan Galungan nuju rahinan Kuningan.

Sané kaaptiang olih para krama pamuputné wantah prasida nyujuh sané kawastanin Suddha Jnana (pikayunan sané suci) mangda prasida dados jatma sané Jayabaya (menang ri kala kapialangin utawi ri kala wénten baya sané pacang nibenin i raga).

Dane taler mapangapti mangda para krama prasida satata éling ring raga mangda prasida nyujuh tetujon idup Moksatham ja gadhita ya Cai thi Dharma.


Berita 7 ( Orti 7 ) :
Judul :  Rasa Éling Yowana Sajeroning Makarya Pénjor Galungan Patut Tincapang

KRÉATIVITAS sajeroning malaksana ring widang seni boya wantah prasida kalaksanayang ring sakatah widang seni kémanten, minakadi ring seni lukis, patung, kerajinan miwah seni sané lianan. Seni Kréativitas taler prasida kalaksanayang ring sakatah widang lianan. Silih tunggilnyané lomba sané kalaksanayang mapaiketan sareng rahinan galungan inggih punika lomba makarya Pénjor sané taler parikrama sané kaselehin becik tur positif.

Pénjor wantah sarana upakara sané mesti wénten ri kala umat hindu pacang nyanggra rahinan Galungan miwah rahinan sané siosan. Pénjor malakaran Tiing, madaging hiasan Plawa, Kelapa, Sampian Jaitan saking janur, Busung, Ambu miwah lakaran lianan. Lumrahnyané, Pénjor pacang kapasang kalih rahina utawi arahina sadurung Galungan ring pamesun pekarangan umah ring Bali. Ri kala penampan utawi arahina sadurung Galungan, sakadi sané dumun wénten désa-désa adat ring Bali sané ngawitin ngwéntenang lomba Pénjor pantara sekaa truna-truni ring soang-soang banjar utawi pantara kulawarga.

Parikrama lomba sakadi punika sampun ngawit karincikang tur kalaksanayang olih prajuru miwah sekaa truna ring sakatah désa sané éling ngajegang budaya tradisional sané sampun katami saking panglingsir ring Bali. Pénjor sané naen kalombang wantah Pénjor upacara sané mapaiketan sareng rahina Galungan, boya Pénjor hiasan (kréasi).

Widang sané prasida katuréksa boya kaasrian Pénjor kémanten sakadi penilaian Pénjor hiasan, nanging tradisi Pénjor, wentuk Pénjor Bali lan kajangkepan sarana sané kanggén pinaka Kréativitas seni miwah lakaran sané kanggén. Lomba Pénjor pinaka jalaran ngajegang budaya lokal Bali mangda tan ical tur prasida kalanturang olih para yowanané gumanti yowana taler éling tata cara makarya Pénjor sané anut.

Lomba Pénjor sajeroning ngraménin rahinan Galungan lan Kuningan, sejabaning pinaka jalaran ngajegang budaya, lomba taler prasida ngwewehin pangweruhan indik semertin Pénjor, sané salami puniki kaselehin kirang kauningin antuk kramané. Yéning nglaksanayang lomba Pénjor tradisional sabeciknyané nénten nganggén lakaran sarana lan pepayasan sané prasida katumbas nanging sebeciknyané sakancan piranti mesti kekaryanang ngraga saha kajangkepin antuk pala bungkah, pala gantung, sanggah, miwah sampian Pénjor.

Pénjor wantah pinaka silih tunggil sarana sajeroning ngastawa Ida Sang Hyang Widhi Wasa. Pénjor upacara mapaiketan sareng upacara agama madué pisarat, nénten ngawag-awag santukan nganutin ajah-ajahan Sastra Agama.

Majalaran lomba taler prasida mupulang krama sareng sami gumanti irika taler prasida kadagingin dharma wecana indik semertin Pénjor. Sajabaning punika taler prasida nyikiang kahuripan sané harmonis manut tatwa Sagilik Saguluk Paras Paros Selunglung Sebayantaka.


Berita 8 ( Orti 8 ) :
Judul :  Nyuciang Angga, Ngicalang Kaletehan

 Akéh krama Hindu ring Bali sané bimbang yéning sampun maosang pacang nglaksanayang rahinan Sugihan pinaka reruntutan rahinan jagat Galungan lan Kuningan. Krama Bali kantun bimbang, rahina Sugihan sané cén pacang kalaksanayang. Sugihan Bali napi Sugihan Jawa?

Maosang indik rahinan Sugihan Jawa miwah Sugihan Bali, i raga dados krama Hindu Bali patut nglaksanayng makekalih rerahinan puniki manut tegesnyané soang-soang. Sugihan Jawa jatuh ring rahina Wraspati Wagé, wuku Sungsang. Rahina Puniki mateges nyuciang Bhuana Agung (Makrokosmos) mawit saking sekala miwah niskala sané kaniasayang antuk nglaksanayang pamuspan ring genah-genah suci rumasuk ring merajan. Mareresik ring pura, nglaksanayang rerebu ring sanggar, parahyangan miwah ring pura-pura siosan, kalanturang antuk nglaksanayang pangraratan miwah pamuspan. Ring Rahina Sukra Kliwon, wuku Sungsang kawastanin rahina Sugihan Bali. Rahina puniki mateges nyuciang Bhuana Alit (Mikrokosmos) utawi angga sarira antuk nglaksanayang panglukatan majeng angga sarirané. Lianan nglaksanayang penglukatan, taler kalaksanayang bakti Yoga sané matetujon ngicénin katreptian pikayunan.

Manut Drs. I Ketut Wiana, M.Ag., ring Rahina Sugihan puniki i raga nglaksanayang panyucian taler pabersihan majeng Bhuwana Alit lan Bhuwana Agung.

“Ring Rahina Sugihan Jawa, i raga nyuciang Bhuwana Agung mawit saking mareresik kantos ngaturang bebanten tur nglaksanayang pamuspan. Rahina puniki mapaiketan sareng Tri Hita Karana. Ring Rahinan Sugihan Bali i raga nglaksanayang panyucian majeng angga sarira santukan ring angga i ragané wénten akéh pisan sifat-sifat sané leteh sané patut kabersihang,” baosnyané.

Dané taler maosang, leteh sané wénten sajeroning angga inggih punika kawastanin Dasa Mala minakadi Tandri wantah anak sané sakit-sakitan, Kleda mateges anak sané stata maselselan, Leja wantah anak sané sombong, Kuhaka wantah anak sané brangti, congkak miwah ajum, Metraya wantah anak sané seneng nguluk-uluk anak lianan, Megata wantah anak sané seneng mabaos tan jakti, Ragastri wantah anak sané seneng memitra, Kutila wantah anak sané sering plintat plintut, Baksa Bhuwana wantah anak sané seneng nyakitin sesamenné, Kimbura wantah anak sané madué rasa iri hati.

“Makasami kaletehan punika sané patut kaicalang sajeroning nglaksanayang rahinan Sugihan Bali. Ring rahina puniki, i raga dados nglaksanayang panglukatan ring jero soang-soang, nanging i raga mangda nunas Tirtha Panglukatan majeng Ida Ratu Peranda. Lianan punika iraga taler dados nglaksanayang panglukatan ring genah-genah suci minakadi ring Pura Tirta Empul Tampak Siring,” baos Wiana ngwewehin.


Berita 9 ( Orti 9 ) :
Judul :  Ngastiti Déwa Sangkara

SARWA tumuwuh (entik-entikan) taler pinaka daging jagaté agung (Makrokosmos) lianan ring sarwa beburon miwah reriptan Ida Sang Hyang Widhi Wasa sané pinih paripurna inggih punika manusa. Nanging sané ngawinang sarwa tumuwuh kawéntenané matiosan sareng reriptan Ida sané lianan inggih punika, yening manusa kaicén Tri Pramana, Sabda (bebaosan), Bayu (tenaga anggén malaksana lan tumbuh) miwah Idep (pikayunan) punika awinan manusa kanggehang pinaka jatma sané mautama, yéning sarwa beburon wantah kabekelin Dwi Pramana (sabda lan bayu), yéning sarwa tumuwuh wantah kaicén Eka Pramana inggih punika bayu kémanten santukan entik-entikan wantah prasida tumbuh ageng.

Sarwaning entik-entikan ring jagaté puniki wénten sané ngempu utawi déwannyané, pamekas ring pulo déwata Bali olih umat Hindu Bali rahina oton majeng sarwa tumuwuh punika kapakelingin ring rahinan sané kawastanin Tumpek Wariga. Yéning selehin malih, napiké sané kabaos Tumpek Wariga olih umat Hindu miwah napiké semertinyané majeng kahuripan ring jagaté?

Umat Hindu Bali salami puniki negesin tumpek wariga pinaka rerahinan sané ngaplug saptawara, pancawara, miwah wuku tur kapakelingin ngenem bulan (210 rahina) apisan ninutin paitungan kalénder Bali. Tumpek Wariga rauh ring rahina Saniscara Kliwon wuku Wariga, nepet rahina punika wantah patemuan saking saptawara (Saniscara), pancawara (Kliwon) miwah wuku Wariga.

Tumpek Wariga semertinnyané boya nyembah sarwa tumuwuh punika, nanging ngutamayang ngastiti Déwa Sangkara pinaka manifestasi Ida Sang Hyang widhi Wasa pinaka déwa sané ngurip miwah ngajegang sarwa tumuwuh, ngawinang tetumbuhan punika prasida mabuah akéh, madon, miwah mabunga. Sajabaning punika yéning kaselehin tetumbuhan taler banget maguna ngwantu nyalantarayang kahuripan manusa sukerta. Tumpek Wariga taler metuéling krama yéning malih 25 rahina pacang rauh rahinan Galungan, punika awinan kramané sami ngastiti majeng déwa sangkara mangda sakancan tetumbuhan sané kaduénang prasida mabuah akéh tur becik pacang kanggén pinaka sarana upacara nyanggra rahinan Galungan.

Rahinan Tumpek Wariga ring Bali kabaosang matios-tiosan olih umat Hindu ring sakatah wewidangan. Wénten sané maosang Tumpek Bubuh, Tumpek Uduh, Tumpek Pangarah miwah Tumpek Pangatag. Napi awinan kabaosang pinaka Tumpek Wariga santukan ring rahina punika nénten kapatutang ngusak-asik tetaruan miwah ngalap sakancan asil sarwa tumuwuh, nanging pinaka jalaran sané becik ngastiti karahajengan sarwa tumuwuh.

Kabaosang pinaka Tumpek Pangarah santukan pinaka arah-arah miteketin krama mangda ngajiang sarwa tumuwuh, prasida miara miwah nandurin malih, nyujuh kahuripan buana agung lan buana alit sané werdi lan shanti. Kabaosang pinaka Tumpek Pangatag santukan ring sakatah wewidangan ri kala kaupacarain punyan tetaruan punika lumrahnyané kaklupakin akedik tur kagantungin gantung-gantungan madaging sagau, miwah baas kuning lan kunyit tur punyannyané kagetok-getok.

Siosan punika Tumpek Wariga Kabaosang pinaka Tumpek Bubuh santukan ri kala tetaruan punika kaupacarain kulit taru kaklupakin akedik raris kadagingin sesajén bubuh sinambi nguncarang sehaa. Sehaa sané lumrah kauncarang ring Bali ri kala rahinan Tumpek Wariga inggih punika “dadong-dadong I Kaki nak kija? I Kaki ya jumah! Nak ngujang jumah? I kaki nak gelem! Gelem kénkén? Gelem nged! Nah né bubuh bang I Kaki, Nged, nged, nged…!” raris sesampun puput nguncarang sehaa punyan sarwa tumuwuh punika katok-tok ping tiga.

Sujatinyané, Tumpek Wariga suksmanyané pinaka silih tunggil utsaha sajeroning ngajegang tatwa Tri Hita Karana. Mangdané i krama sané sampun éling prasida nincapang rasa élingnyané tur sawaliknyané i krama sané lali prasida mawali éling ring Ida Hyang Widhi Wasa, tetep éling ngajiang anak tios miwah taler satata éling ngajiang palemahan sane wénten ring wewidangan.

Kramané nglaksanayang upacara Tumpek Pengatag puniki lumrahnyané kalaksanayang ring pakarangan miwah tegalan, sané katah madaging tetaruan. Gumanti Sang Hyang Déwa Sangkara satata ngicén waranugraha majeng i krama sami majalaran sarwa tetanduran.


Berita 10 ( Orti 10 ) :
Judul :  Tan Wusan Makesenian

KOMANG Apel pastika aran sané sampun kaloktah ring kesenian drama gong sané naenin jaya ring éra 80-an. Sareng I Gedé Yudana (alm), Gangsar, Dadab, Kiul (alm) miwah bintang drama gong lianan, kawéntenan dané ring panggung pentas ri kala punika sayuakti kajantosang antuk ida dané sané nyenengin drama gong. Kawéntenan Komang Apel antuk lawakan khas, kasokong tata rias prerai lan aksi panggung lincah, dados daya tarik dané. Minab tan akéh sané uning, yéning anak lanang sané embas ring Dénpasar, 31 Désémber 1947 punika, naenin pinaka PNS ring Universitas Udayana. Dané sané madué aran KTP Ida Bagus Raka Pudjana mutusang pensiun daweg warsa 1997, ngamel jabatan pinaka Kasubag Fasilitas lan Informasi Kemahasiswaan Unud.

Manut seniman puniki, katah pejabat ri kala pensiun rumasa jejeh. Jejeh kilangan jabatan, fasilitas miwah bawahan sadaweg ngamel jabatan. Napimalih majeng pejabat sané banget ngagungang jabatannyané. Sujatiné jabatan punika wantah amanat tur sesampun galahnyané mesti kawaliang malih.

“Kantun akéh anaké sané buduh ring jabatan. Ida dané nénten eling jabatan punika wantah tanggungjawab sané ageng. Iwang akedik mesti maurusan sareng hukum. Sayuakti galahé mangkin katah pejabat sané ngranjing hotél prodéo,” baos Ida Bagus Raka Pudjana antuk gaya khasnyané.

Bapak sané madué oka tetiga taler kaicén putu pepitu puniki kantun éling pisan. Pakaeng silih tunggil sumitranyané sané naénin ngamel tegak ring Pemprop Bali. Ri kala mantan penguasa punika keni panyungkan stroke lan Ida Bagus Raka Pudjana ngiringang ipun terapi pasir laut ring pasisi Sanur, mantan pejabat puniki makaengan, antuk kahananyané makadi punika, tan wénten pisan saking penyatusan anak sané kawantu lan polih “tangkil” mangda prasida molihang jabatan urati majeng kawéntenanyané.

Kahanan punika sapatutné kanggén paplajahan majeng ida dané sané kantun ngamel jabatan, mangda satata malaksana madasar aturan, gumanti sesampun wusan ngamel jabatan prasida rumasa tis.

Tan naénin rumasa bangga pisan sareng jabatan sané kagamel lan ibuk makesenian, ngawinang suamin Ni Wayan Kardi, S.Sos (Jero Tunjung) puniki nénten rumasa kilangan ri kala pensiun. “Katah pisan timpal-timpal PNS sesampun ngranjing masa pensiun rumasa suwung. Ngraksa sakatah panyungkan kantos stadium berat,” baos seniman multitalénta puniki.

Ketua Asprananta Bali puniki metuéling para pensiunan punika mangda nénten banget rumasa kilangan. Nanging ngawitin kahuripan manyamabraya miwah ngawigunayang galah antuk parikrama sané becik. Rumasuk makesenian minakadi Ida Bagus Raka Pudjana. Yadiastun nénten malih pentas ring panggung.

Semeton sareng sami,, mungkin hanya segitu yang dapat sya lampirkan,, namun tak usah kwatir ,, masih banyak koq contoh berita berbahasa bali yang saya sediakan. Silakan Klik salah satu judunya dibawah ini, anda akan di bawa langsung ke beritanya terkait.
•     Mabuat pisan Numbuhang Nilai-Nilai Sosial
•     Tirta Empul Pinaka Genah Melukat Anggén Ngicalang Kaletehan
•     Upacara Sad Kertih
•     Nglebur ''Mala'', Nyuciang Angga ring Pura Selukat
•     Déwi Saraswati (1)
•     Canang Sari pinaka Nyasa Kasucian lan Rasa Lascarya
•     Canang Sari Pinaka Sarana Upakara sané Utama
•     Upacara Otonan “Nelu Bulanin”
•     Ida Batara Turun Kabéh ring Besakih Panyiuan Umat “Ngiring Masucian”
•     Upacara Mabiukukungan
•     Pertanian ring Era Global
•     Ulian Adan
•     Muyungin Raga
•     Angen Sang Manik Sajroning Garba
•     Rurung Idup Rurung Idup
•     Sagara-Giri Adu Muka ring Gunung Payung
•     Agama Kalis Magama Kelés
•     Galungan ...''Sadri Returns to Bali''
•     Astha Basu
•     Leluhur
•     I Kaki Dengkil: Nyiwalatri
•     Nerakaloka
•     Aget Lacur
•     Niskriya
•     Biopéstisida Anggén Busuk Batang Panili
•     Tanah Bali Boya Ja Tetamian Dados Adol
•     I Kaki Dengkil; Mamanah Matakén ring Sang Angawarat
•     Saking workshop lan lomba ngambar ring baju kaos
•     Bulutangkis Pinaka Olahraga sané Prasida Ngamedalang Préstasi
•     Ri Kala Manusa Marebut Idup
•     Rajan Bikul
•     Panes
•     Nemuang Biosurfaktan Deterjen Cair
•     Ngawigunayang Selulosa Eceng Gondok Anggén Biosurfaktan Deterjen Cair
•     Ngidih Tekén Awak
•     Bali Kadadosang Targét Bisnis Narkoba
•     Tapel
•     Bangkung Kangkang Ing Kaung
•     Saking Buléléng, Nangiang Seni Topéng Bali
•     Wayang Wong Téjakula dados Uratian Jagat
•     Nglimbakang Topéng Lokal
•     Neliti Don Waru Anggén Nambanin Dekah
•     Don Waru, “Obat Batuk Herbal”
•     Mas Ruscitadéwi
•     Mas Ruscitadéwi
•     Rambut di Langit
•     Olih I Wayan Juniartha
•     IBW Widiasa Kenitén
•     Ombak, Karang, lan Cerita I Kadasih
•     I Wayan Paing
•     IDK Raka Kusuma
•     Olih I Nengah Konten
•     Yatna ring Masan Sabeh
•     Ngusaba Jagat ring Pura Agung Kentel Gumi Klungkung
•     Duh Ratnayu Ndatan Pasiring Nindyéng Sarat
•     Pawarah Kapolda Bali, anak alit sané nyopir patut kajuk.Punapi yén reramanné rauh magapgapan?
•     IBG Pujaastawa Sangkaning Méntalitas
•     Alit-alit Baliné Ngejotang Angkihang ring Marginé
•     Ring Sekolah
•     Pradnyan
•     Penghargaan “Anugrah Basa Sugriwa lan Sastra Tantular”
•     Kontingén Siswa Bali Juara Umum Tiga ring OPSI 2011
•     Duta Bali ring OPSI 2011
•     Prof. Dr. I Madé Titib Pinaka Tetuladan
•     Karangasem Yatna ring Flu Burung
•     Nganggén Wastan Tokoh Wayang Pinaka Wastan Pianak
•     Manajemen MALU
•     Dueg Duegin
•     Budaya, Adat, Maagama Hindu?
•     Shanti
•     Kramané Marebatin Genah; Bandara Internasional Katulakang
•     Budaya, Adat, Maagama Hindu?
•     Pitrayana
•     Seneng Makarya Puisi Bali
•     Jit Melekus
•     Roang
•     Mua Badak
•     Séks ring Kama Bang Kama Putih
•     Média
•     Makarya Tipi
•     MPTV-Online
•     Ati Putih
•     Bayuh Oton, Mangda Satata Éling
•     Mabayuh Mangda Dayuh
•     Ngaptiang Rahayu Majalaran Antuk Bayuh Oton
•     Parindikan Kasus Adat Sayan Nyebetang
•     Isin Basang
•     Gadang
•     Makréasi
•     Lulusan Tan Katampung, Pengangguran Ngalimbak
•     Ngajahin Ngaryanin Srana Banten
•     Ngabén Gebogan, Nulungin Krama Tiwas
•     Puisi; Kruna lan Lengkara
•     Peluru Tak Terbatas
•     Massal
•     Yadnya Massal Gratis Nénten Satata Becik
•     Seger
•     JKBM, Durung Tepat Sasaran
•     Masuluh saking Asil Penelitian
•     MATELISI
•     Semara Dudu
•     IBW Widiasa Kenitén
•     Manggala Adat Patut Nelebin Panca Ah
•     Sampunang Nangiang Manggala Adat Sangkaning Briuk Siu
•     Korupsi, Ngawé Manah Veterané Sungsut
•     Nyaluk Grehasta
•     Kuputra
•     Ida Ayu GS Marhaeni
•     Dharmaning Negara
•     Yan kénten tulung jimbarang tanah Dénpasaré.
•     Lansia; Makéh sané Keni Pinyungkan
•     olih I Madé Suwitra
•     Olih I Wayan Juniartha
•     Mas Ruscitadéwi
•     Baya Maboya
•     Ibu
•     I Madé Sugianto
•     Makasami Margi Désa ring Buléléng Pacang Kahotmik
•     Duta Bali
•     Cupak Menang
•     AWIG-AWIG
•     Moksa
•     Lascarya Dasar Kalepasan
•     Nyabran Rahina Bali Sayan Kosek

 kLIK Ja,Salah satu judul diatas. semua link tersebut adalah contoh berita yang berbahasa bali.
Akhir kata saya ucapkan, terimakasih. SEMOGA BERMANFAAT JA.




4 Responses to "CONTOH BERITA BERBAHASA BALI "

  1. adi gak bisa di kopas ?

    BalasHapus
  2. gan ga bisa di copy paste gimana nii,,,,?

    BalasHapus
  3. mantap. sayang ane ndak ngerti bahasa bali gan.. perlu belajar lagi..

    www.kiostiket.com

    BalasHapus

Catatan:
1. Berkomentarlah dengan bahasa yg jelas dan mudah dimengerti.
2. Untuk menyisipkan gambar gunakan kode [img]Tulis URL gambar di sini[/img]
3. Untuk menyisipkan video gunakan kode [youtube]Tulis URL Video Youtube di sini[/youtube]
4. Untuk melihat kumpulan emoticon klik tombol emoticon dibawah ini.
Emoticon

Google+ Followers

Bagaimanakah web murah hati menurut anda?